مواضيع تهم المقبلين على الزواج وخاصة الشباب

بسم الله الرحمن الرحيم


في بداية الموضوع راح اسئل
كل شاب مجموعة اسئلة
1- لماذا نتزوج ؟
2- هل راح تتزوح عن قناعة ؟
3- هل تعرف ماهي الانثى ؟
4- هل راح تتزوج انسانة تشتغل ؟
5- هل تقبل ان تكون في اي وظيفة ؟
6- هل تتزوج من سبق لها الزواج ؟
7- هل تتزوج من سبق ان تعرفت
عليها سواء بالانترنت او الجوال وخلافه ؟
8- هل راح تشارك زوجتك في
اعمال المنزل وتربية الاطفال ؟
9- من هي الفتاة الامثل في نظرك ؟
10 - هل الزواج قفص او الزواج متعة ؟
11- الحب في نظرك قبل الزواج ام بعده ؟
12- ماهي الفترة المناسبة للخطوبة ؟
13- هل عندك رغبة تتزوج اخرى مستقبلا ؟ ومتى تفكر ؟
14- هل تفكر بضرب زوجتك عند اي سبب من الاسباب ؟
--------------------------------------------------------------------------------
نبدا على بركة الله
الزواج : هو مشاركة بين اثنين
ذكر وانثى وكلاهما مكمل لبعض
في اطار علاقة شرعية حسب ماامرنا
الله وبالتالي فان الزواج لن ينجح الا
بتفاعل الاثنين معا فيه بمعنى لاتهمل
دور زوجتك والاخذ دائما برايها
ولا بد من مشاركتها في جميع امور
حياتك وان لاتجعل دورها مهمشا فهي
زوجتك قبل كل ذلك ولاتفكر ابدا في
يوم ان تجعل قوامتك عليها بان تكون
قاسي عليها فهي زوجتك ولاتنسى ان
كلمة الزوج من الاشياء يعني اثنين
يعني يابني آدم افهم انو هذه ام عيالك
وحرمتك ماهي شغالة عندك
---
بالنسبة للزواج عن قناعة المقصود
فيه هل راح تتزوج وانت مؤهل انك
تتحمل مسؤولية شخص ثاني في حياتك
ولا اهلك فرضوها عليك ولازم تتزوج
وفلانة عجبتنا ولازم تتزوجها
ينبغي عليك اخي الشاب ان تفكر في
البداية وماذنبها اذا تزوجتها
عن قناعة او لا
فيه غيرك ياابن الناس ماهو قادر
يتزوج وانت ناوي تتزوج يعني احمد
ربك لاتدمر حياتك قبل ماتبدا واعلم ان
الزوجة لو كانت عاقلة ومتفهمة راح
تقول ياريت تزوجت من زمان يعني انت
الي راح تخلي للزواج طعم بمشاركتها
------
الانثى / قد يعجز اللسان وتجف
الاقلام ان وصف الانثى
ولكن اجتهادا مني راح اقولك
من هي الانثى
الانثى ياسيدي هي امك واختك
وعمتك وخالتك وزوجتك وجارتكم
وغيرهم طيب وراح تقول مين هي وخلصنا
اول حاجه الانثى بغض النظر عن طبيعة

صلة القرابة بينك وبينها هي
نبع الحنان الذي لاينضب وهي كتلة مشاعر
جياشة وهي العقل الذي اذا فكر ترى العجب
العجاب ينبغي علينا ان لانهمل ابداعات المرأة
في شتى المجالات
المراة ياسيدي وردة حياتنا وهي الهواء
الذي نتفسه خذها ببساطة يااخي ليش ربنا
خلق امنا حواء لابونا آدم ربنا خلقها
عشان يجعلها سكنى وراحة له وكمان
عشان تكثر البشرية
الانثى ياسيدي كائن شديد العذوبة
وشديد الرقة يعني لاتنسى اهم
الحاجات عنها
وهي طفلة تجنن في كلامها
وتعجبك في حركاتها وتحسها تكبر بسرعة
وتشوف انها حنونة على اخوانها الاولاد
وتميل دايما تجاه الاب طفولتها روعة
وهي كبيرة شوية ونقول هي في سن
المراهقة تعجبك بانها طفلة كبيرة تصرفاتها
مزيج بين طفلة وبين وحده كبيرة توها بالغة
وتوها خاشة عالم الكبار تفاجا منها في بعض
تصرفاتها وتجد فيها تمرد على نفسها وتميل
الى العزلة احيانا لانها في مرحلة بناء العقل لها
وهي شابة بدات تدخل عالم الانوثة الفعلي
وبدات تهتم بنفسها وجمالها وبدات تجهز
انها تكون زوجه
وهي ام تجد فيها نبع الحنان
على اولادها والخوف عليهم وخوفها
على زوجها والمحافظة على اسرتها
الصغيرة
وهي جده تجد في ابهى حلتها واحفادها
من حولها وتروي لهم قصص زمان
وتهتم باحفادها وتعطيهم عيدية في العيد
وتجيبلهم ملابس بنفسها
باختصار مااروع الانثى
في جميع اعمارها
اعلم قاعده مهمة عنها انو
مافي انثى ماهي حلوة
ولكن فيه انثى ماتهتم بجمالها
-----
المراة هي نصف المجتمع
وماهو عيب انها تشتغل
وممكن لو انو زوجها دخله
بسيط راح تساعده في دخل البيت
وممكن تساعد اهلها كمان من فلوسها
------------
اي وظيفة ماراح تكون عيب
ولكن عيبنا انو نشوف المراة فى
وظايف معينة وبس كان تكون
مدرسة او موظفة بنك وبس ولكن دكتورة
او ممرضة نحكم عليها انو هذي الوظيفة
عيب ومااعرف ايش
ياناس لو نفكر شوية بعقلنا
راح نلاقي انو المراة كانت
مبدعة في كل مجال اشتغلت
فيه ونجد انهم يشتغلو
من ايام الرسول وقبلها
ويااخي من عهد الرسول
وهي اشتغلت ممرضة في الحروب
اتمنى انو نحكم عقلنا قبل
مانحكم عليهم في اي حاجه
---
بالنسبة لموضوع من سبق لها الزواج
ايش اللي يمنع انك تتزوجها هي
انسانة عاشت تجربة وفشلت ليش نلغيها
من المجتمع ونجلعها مهمشة ترى
عقلها في كثير من الاوقات يكون
خلاص ناضج وبعدين ايش نظرتك
لها لو كانت اختك او قريبتك راح
تنظر لها بنفس النظرة
----------------
بالنسبة للزواج بمن سبق تعرفت عليها
راح تقول الشك ومااعرف ايش وكيف
اضمن اخليها مع عيالي واذا خرجت
راح تكلم فلان وعلان يابني آدم مو انت
اللي متعرف عليها معناه انت شريك في
اللي صار واذا شكيت فيها معناه انت
انسان مانك واثق من رجولتك لانك او
اعطيتها كل الي تبغاه ماراح تفكر تنظر
لشخص غيرك وايش المانع انك تتزوج
وحده عرفتها مادام انكم عارفين بعض
وعرفتو غلطكم وحبيتو يكون في اطار شرعي
وكمان احمد ربنا انها رضيت تتزوج
واحد زيك وانت تلاقيك ولا بلاشي
----
وليش ان شاء الله ماتشاركها لاتقول
انا رجال وانا مااعرف ايش وبلاشي
خرابيط حقتك
افضل الخلق كان يساعد زوجاته
وصدقني هذا راح يقربكم من بعض
اكثر وراح تجد متعة وانت بتساعدها وراح
تكبر في عينها ومعنى انك تشاركها
معناها انك عارف انها ماهي شغالة انت تزوجتها
ساعدها في تنظيف البيت ولما تشوفها
تعبانة في يوم لاتكون قاسي عليها وتزعق
يااخي الحل بسيط روح اشتري
اكل من بره ولا امزح معاها
وقولها عقابا لكي راح ناكل بره
والحساب عليكي وهي
اصلا فلوسك ياذكي
لاتحاول تكبر اي مشكلة بخصوص
اعمال المنزل لانو في الاخير راح تكون تافهة
-----
مافي حاجه اسمها الفتاة الامثل ، الفتاة
هي فتاة ولكن فيه فتاة متميزة عن غيرها
وانت قلبك اختارها او اهلك اختاروها لك
ومعنى كده انها تميزت عنهم وكل فتاة
هي متميزة بحد ذاتها
----
ليش نحط في بالنا انو الزواج
هي نهاية الدنيا وانو الي تزوج
كانو راح لنهاية عمره ياناس الزواج الي يعرفه
على حقيقته راح يذوق حلاوة الدنيا
شوف ايش راح يصير لو تزوج
اول حاجه راح يجد شخص يشاركه حياته
ويكون معاه في السراء والضراء
وتاني حاجه راح يحط غريزته في الحلال
وتالت حاجه راح يفضى لعمله بدل مايفكر
في البنات وبس
وغيرها حاجات مرة كثير
-------
بعضهم يقولك سنة وبعضهم
يقولك شهرين
الخطوبة هي تعارف بين الاثنين كل
واحد فيهم يعرف الاخر وكلهم يقولو
انها اكثر فترة فيها كذب بين الاثنين
انا اقول انو الخطوبة هي دعامة منزل
الزوجية يعني تحافظ عليها حاول تكون
فيها صريح مع شريكة حياتك
---
وليش ان شاء الله تتزوج وحده غيرها
وهي قايمة بكل واجابتها ولا هي
فضاوة وعيون طويلة
طبعا ماراح نقول ليش تتزوج
تانية وتالته لانو ربنا احل لنا
نتزوج مثنى وثلاث ورباع
بس لاتنسو مبدا العدل بين الزوجات
وبعدين ليش تتزوج وحده غيرها
ياريت قبل ماتفكر تتزوج غيرها
اقرا كتب شريعة وشوف متى انسب
وقت انو نتزوج وحده تانية
---
بالنسبة لضرب الزوجات او
حتى غير الزوجات
الرجال الي يضرب انثى هذا
ماهو رجال يعني حتى لو
غلطت آخر حاجه هي الضرب
واذا كان فيه ضرب ليش العنف
يااخي اذا كان الرسول يقول انو
الضرب بالسواك عشان لاتجرحها
وقبل ماتفكر تضربها فكر انو فيه
بينكم ايام حلوة وانها ماتستاهل الضرب
لانها زوجتك ولاتنزل نفسك من عينها
-----------------------
اخواني معشر الشباب اتمنى انو كل
واحد مقدم على الزواج او حتى الي
مايبغى يتزوج يراعي في النساء
خيرا فهم فاكهة حياتنا
والبنت الي راح تتزوجها
هي وردة في بستان اهلها فحافظ
عليها عشان تستمع فيها وفي ريحتها
وحسسها انك الامان والحنان وانها
تزوجت رجل بمعنى الكلمة
ياشباب لا احد يزعل اني كنت في
صف البنات لكن صدقوني حكموا
العقل قبل كل حاجه